ST Marijina hwězda
– ST Nadrózna Hrabowka 1:1 (0:1)
Zestawa domjacych: O. Schmidt – Wróbl, Škoda, Hübner (73. Prasse), R. Hawš, Čornak (65. Jehnichen), Winkler, O. Hawš, Eldor, Pakoßnick
Po naposledk třoch dobyćach pospochi dyrbjachu so klóšterscy koparjo z remisom spokojić. Zo njebudźe to lochki duel, wšak bě hižo do toho jasne. Nimo toho dyrbješe trenar Erwin Kleinmann swoje mustwo hnydom na wjacorych pozicijach přestajić, dokelž stajni hrajerjo pobrachowachu. Najebać to hosćićel najprjedy raz režiju na hrajnišću přewza. Šansa Paula Schmidta (7.) ze zdalenosće 22 metrow kaž tež móžnosć Matijasa Wróbla (17.) z kónčkojteho kuta pak k 1:0 njewjedźeštej. Hosćo agěrowachu z kompaktneje defensiwy a łakachu na kontery. Po zmylku domjacych na lěwym křidle pokazachu koparjo z Nadrózneje Hrabowki spěšny a wobhladanjahódny konter, kotryž dyrbješe Tommy Wendt jenož hišće přez liniju stłóčić (33.). Někotre sekundy po tym móhli Pančičenjo wurunać, Alexej Winklerej pak čuwy zaprajichu (34.).
