38. koparske wubědźowanje wjesnych cyłkow w Pěskecach
Po póndźelnej putniskej Božej mši w Róžeńće je Fabian Korjeńk ze starosćiwym hłosom a chutnym mjezwočom hišće sudnikow za 38. swjatkowny koparski turněr wjesnych mustwow pytał, póndźelu wječor pak radowaše so Pěskečan z pozběhnjenej hłowu a wjesołym mjezwočom z wjesnjanami nad dobyćom a dosahacej ličbu refereejow. W finalu přesadźi so domjacy cyłk 3:2 po třělenju jědnatkow přećiwo Serbskopazličanam, kotřiž běchu sej loni pokal zawěsćili. Rozsudnu jědnatku přetwori turněrowy nawoda Fabian Korjeńk sam.
Kaž hižo wjacore lěta do toho bě znowa wosom wjesnych mustwow w Pěskečanskim lěsnym stadionje k „Dźiwjej rancy“, kaž ju stadionowy rěčnik Jurij Matka-senior rady mjenuje, nastupiło. Zarjadowar a wuhotowar bě wospjet wjesne sportowe towarstwo ze swojim předsydu Křesćanom Mjechelu. Hižo w skupinskej fazy dyrbjachu sej cyłki wulku prócu dawać, wšako smědźeštej jenož staflowej dobyćerjej do finala zaćahnyć. To poradźi so zastupnistwomaj z Pěskec a Serbskich Pazlic.
