Rjana tradicija na Serbskim gymnaziju Budyšin (SGB) je, zo wučerjo a rozžohnowacy so abiturienća na kóncu šulskeho lěta hišće raz při wysokim saku mocy měrja.
Po jubilejnym 25. duelu muskeje generacije w juniju 2017, kotryž pedagogojo z 2:1 dobychu, dóńdźe minjeny tydźeń k dalšej partiji w sportowni Budyskeho Serbskeho šulskeho a zetkawanskeho centruma. Kónčne 3:0 za aktualneho wokrjesneho mištra wučerjow klinči jasne, ale dwanatkarjo dopokazachu, zo běchu runohódny partner. Při stawje 24:23 w druhej sadźbje skićeše so jim šansa na wurunanje. Woni pak worachu njetrjebawše zmylki. Tak sej pedagogojo z wjetšej rutinu trěbnej dypkaj zawěsćichu. Prěnju sadźbu přěhrachu šulerjo z 17:25, dokelž praskachu hnydom sydom nadaćow do saka abo zwonka pola. W třećim přechodźe bě jich wotebraće nadaćow přenjedokładne a nadběhi wuličomne. Wučerjo so z 25:16 přesadźichu.
