Po 24 lětach su Šwe­dojo zaso raz štwórć­finale swětowych koparskich mišterstwow docpěli. Wčera popołdnju dobychu woni 1:0 přećiwo Šwicarskej. Skandinawičenjo běchu so lěpje do hry namakali. Składnosć Marcusa Berga, třělwa Albina Ekdala z druheho rynka přez wrota a dalša móžnosć Berga, jako šwicarski wrotar sylnje reagowaše, pak wostachu najprjedy bjez wuspěcha. Najlěpšu móžnosć za Šwicarsku w prěnim połčasu přetřěli Blerim Džemaili. Po dwójnym pasu ze Stevenom Zuberom steješe wón w šěsnatce swobodny, wrota pak njetrjechi. W druhim połčasu nawjedowachu Šwedojo přez Emila Forsberga z 1:0. Před šěsnatku bě tón na wrota třělił, bul prasny do nohi Manuela Akanjisa a wottam lećeše njedźeržomnje do syće (66.). Krótko do kónca startowachu Šwedojo hišće raz konter a bychu nimale 2:0 třělili. Martin Olsson běžeše sam na wrota, Michael Lang sprintowaše za nim a jeho před šěsnatku njefairnje zadźerža. Sudnik Damir Skomina rozsudźi so za jědnatku, a Lang dósta čerwjenu kartu.