W stawiznach Serbskeho gymnazija Budyšin (SGB) docpěchu bičwolejbulisća třeći raz kónčne krajne finale we wurisanju „Młodźina trenuje za olympiju“. W lětomaj 2014 a 2016 wróćichu so naši sportowcy ze štwórtym městnom, tónraz wuskoči w Drježdźanach dobre pjate městno.
Srjedź junija dojědźechu sej hrajerki a hrajerjo wokoło kapitana Dawida Wowčerja do Drježdźan, zo bychu w sakskim finalu bičwolejbula sobu wo medalje wojowali. Bě to wot spočatka ćežki nadawk, wšako čakaštej na nich w stafli 1 ze Sportowym gymnazijom Drježdźany a Gymnazijom „Am Sandberg“ Wilkau-Haßlau sylnej konkurentaj. Chcychu-li na kóncu wo bronzu hrać, bě wuspěch přećiwo sportowcam z Wilkauwa-Haßlauwa wuměnjenje.
