Narodne koparske mustwo Chorwatskeje je prěni raz w stawi­znach swětowych koparskich mišterstwow kónčnu hru docpěło. Chorwaća přewinychu wčera wječor w połfinalu Jendźelsku po 120 hratych mjeńšinach z 2:1. Najprjedy pak nawjedowachu Jendźelčenjo, po tym zo bě Kieran Trippier wólny kop ze zdalenosće 17 metrow direktnje do praweho kuta přetworił (5.). Krasne to wrota, nastate zaso raz po standardźe. K dźewjeć z cyłkownje dwanaće wrotow, kotrež su chowancy trenarja Garetha Southgata lětsa w Ruskej třělili, je dóšło po jědnatce, wólnym kopje abo róžku. Tež 2:0 by so někotre mjeńšiny pozdźišo po róžku nimale poradźiło, jako zhłójčkowa Harry Maguire bul strašnje na klětku (14.). Tež po tym wostachu Jendźelčenjo dale strašniši. Dwójnu šansu měješe Harry Kane, najprjedy pak zwrěšći na wrotarju a po tym na žerdźi (30.). Chorwatscy hrajerjo móžachu w tej fazy hry někak sobu dźeržeć, k přećiwniskim wrotam pak so přezrědka předrěchu.