Serbski gymnazij Budyšin (SGB) ma dwě sportowči, kotrejž stej na wurisanjach „Młodźina trenuje za olympiju“ hnydom w štyrjoch sportowych družinach sakske krajne finale docpěłoj – a to we wolejbulu, w kopańcy, lochkoatletice a bičwolejbulu. Na tajki wurjadny rekord smětej Helena Hejduškec a Tadeja Šeferec jara hordej być. Sportowy wučer SGB Měrko Korjeńk je so z nimaj rozmołwjał.
Předstajtej so prošu čitarjam Serbskich Nowin ...
Helena: Ja sym Helena Hejduškec a bydlu na Horje. Sym 16 lět a póńdu wot awgusta do 11. lětnika Serbskeho gymnazija.
Tadeja: Sym Tadeja Šeferec a tohorunja z Hory. Tež ja budu po lětnich prózdninach w 11. lětniku SGB dale wuknyć.
Što su Waju najlubše předmjety w šuli?
Helena: Sport, zajimuju pak so tež za biologiju.
Tadeja: Sport.
Kak husto stej na sakskich finalach pódla byłoj a kelko medaljow stej dobyłoj?
Helena: Moje prěnje krajne finale bě w juniju 2013 w Lipsku, jako smy sej w 5. lětniku slěbro w kopańcy wubědźili. Cyłkownje móžu na dźewjeć sakskich finalow zhladować, hdźež wubědźich sej jednu złotu, dwě slěbornej a dwě bronzowej medali.
