Ze šěrokej diskusiju zakład za serbski kubłanski system přichoda tworić

Budyšin (SN/at). Wulki nawal připosłucharjow drje njeběše, ale dosć zajimcow je pjatk wječor zahajenje zjawneho přihota projekta „Serbski kubłanski system přichoda“ sćěhowało – na přeprošenje kubłanskeho wuběrka Serbskeho sejma w Budyšinje. Nimo wobdźělnikow na „Starej póšće“ su ludźo online doma na wobrazowce diskusiju na wědomje brali. Zaměr projekta je, „přinošować k samopostajenemu a trajnemu wuspěchej při zachowanju a wožiwjenju serbskich rěčow“, moderatorka wječorka dr. Christiana Piniekowa wuzběhny. Kaž zwurazni, měri so projekt na delnjo- a hornjoserbšćinu kaž tež na slepjanšćinu. To bě tež konsens mjez přitomnymi. Po słowach dr. Piniekoweje su w Delnjej Łužicy hižo tójšto wo tym diskutowali.