Marko Šiman chwali sej pozběhnjenje Budyskeje powołanskeje akademije

Drježdźany/Budyšin (SN/MiR). Sakski krajny sejm je po intensiwnej diskusiji zakoń wo dalewuwiću Powołanskeje akademije Sakskeje na Dualnu wysoku šulu Sakska (DHSN) schwalił. „Wobzamknjenje Sakskeho krajneho sejma je we wjacorym nastupanju dalši měznik we wuwiću wědomostneho kraja Sakska. Za našich studowacych a absolwentow stupa z tym hódnota jich wotzamknjenjow, wšako změja nětko akademiske zakónčenje“, rjekny prezident Powołanskeje akademije Sakska, prof. dr. ing. habil. Andreas Hänsel na naprašowanje našeho wječornika.