We wulkoměstach dale a mjenje porodow – serbske pěstowarnje wućežene
Budyšin (SN/AN). W sakskich wulkoměstach – w Drježdźanach, w Lipsku a w Kamjenicy, zwěsćeja zamołwići dale a bóle woteběrace ličby porodow. Wuskutk toho je, zo w komunalnych dźěćacych dnjowych přebywanišćach prosće dźěći faluja.
Město toho pak, zo bychu kubłarki a kubłarjow z dźěła pušćili, chcedźa zamołwići kubłansku kwalitu polěpšić. Woni widźa w niskej ličbje dźěći tež šansu: Kubłacy móža so ćim indiwiduelnišo swojim chowancam wěnować. Dźeń a trěbniše je spěchowanje socialneho a emocionalneho zadźerženja. Tež dźěći z deficitami w rěčnym wuwiću abo z ćežu rěče migraciskeho pozadka dla, trjebaja wjace přichilnosće.
