LaSuB rozmołwu ze staršimi wotprajił – SŠT frakcijam sejma pisało
Radwor (SN/mb). Staršiska rada Radworskeje serbskeje zakładneje šule je sej za wčera zastupjerce Krajneho zarjada za šulu a kubłanje (LaSuB) na rozmołwu do šule přeprosyła. Tema bě rozsud zarjada, kotryž chce šěsć serbskich šulerjow dotalneje serbskeje rjadownje třećeho lětnika z 19 němskimi dźěćimi do jedneje rjadownje noweho štwórteho lětnika tyknyć (Serbske Nowiny su rozprawjeli). Zastupjerce LaSuB stej najprjedy připrajiłoj, ale „ze słužbnych přičin“ krótkodobnje wotprajiłoj. Kaž je nam rěčnica staršiskeje iniciatiwy a kubłanska referentka Domowiny Katrin Suchec-Dźisławkowa zdźěliła, stej zastupjerce LaSuB pisałoj, zo stej „rady zwólniwej, rozsud z Wami rozjimać“, ale w rumnosćach LaSuB.