Wuměnjenje za zastojnstwo na gymnaziju je wobknježenje serbšćiny

Budyšin (SN/MiR). Aktualne wupisanje přichodneho zastupowaceho nawody resp. přichodneje zastupowaceje nawodnicy Budyskeho Serbskeho gymnazija je mjez Serbami, kotřiž su za naležnosće serbskeho kubłanja zamołwići, njezrozumjenje wuwabiło. Wupisanje je trěbne, dokelž so dotalna wjelelětna zastupowaca nawodnica kubłanišća Felicitas Kralowa klětu, a to poměrnje na spočatku lěta 2025, na wuměnk poda. W němskej a serbskej rěči sformulowany dokument bu na digitalnej platformje Karriereportal Sachsen bjez pokazki na to wozjewjeny, zo ma požadar abo požadarka serbsku rěč w ertnej a pisomnej formje wobknježić. Tuž je so předsydka Serbskeho šulskeho towarstwa (SŠT) Katharina Jurkowa pisomnje na nawodu Budyskeje wotnožki Sakskeho krajneho zarjada za šulu a kubłanje (LaSuB) Mathiasa Petera, wobroćiła. W swojej mejlce piše wona zastojnikej­, zo by so po jeje zrozumjenju „njewotpohladne misnjenje“ spěšnje změnić dyrbjało.