Na konferency Serbskeho šulskeho towarstwa tež słowoskład rozšěrili

Pančicy-Kukow (SN/MiR). Kubłanje w zmysle naslědnosće bě tema 3. fachoweje konferency !RěčMy! w bróžni klóštra „Marijina hwězda“ w Pančicach-Kukowje. Zmysł zarjadowanja wo podatej temy běše, přitomnym wobsahi poskićeć, z kotrymiž móža šulerjow za to wukmanić, naslědnje myslić a jednać. Serbske šulske towarstwo je zhromadnje z Domowinu wčera popołdnju w prěnim rjedźe wučerjow wšěch lětnikow, referendarow, socialnych pedagogow a studentow pedagogiki přeprosyło. Dźensa dopołdnja měrješe so wěcowny diskurs na kubłarjow w pěstowarnjach a hortach, na nawodow kubłanišćow a wučomnikow.