Biskopičanska syć za dźěło z dźěćimi a młodźinu (KiJu) njeje na to přihotowana była, zo hižo srědki za projekt Partnerstwo za demokratija njedóstanje. Mjeztym su sobudźěłaćerce hižo dźěłowe zrěčenje wupowědźić dyrbjeli.

Biskopicy (SN/MiR). Kónc zašłeho lěta běchu w KiJu hišće z toho wuchadźeli, zo so projekt Partnerstwo za demokratiju wot Budyskeho wokrjesa dale spěchuje. Wot septembra běchu krajnoradny zarjad wo rozmołwu nastupajo dalše postupowanje prosył. Hač do hód pak so ničo njesta. Porno tomu bě krajnoradny zarjad Zwjazk a Saksku wo dalše spěchowanje prosyło a wuhlady běchu dobre. Tola w decembru je zarjad hižo stajenu próstwu wo spěchowanje wróćo sćahnył. Wokrjesny sejmik je na swojim posedźenju 16. decembra 2024 we wuradźowanju wo etaće 2025/2026 zakónčenje projekta wulkeho finančneho deficita dla wobzamknył. Lětsa, 21. januara je wosobinski referent krajneho rady KiJu zdźělił, zo so projekt po rozsudźe nawodnistwa krajnoradneho zarjada hižo dale njepowjedźe. 31. měrca ma krajnoradny zarjad wokrjesnym radźićelam namjety za dalše zalutowanja předpołožić.