Budyšin (jp/SN). Serbske šulske towarstwo (SŠT) zmóžnja kóžde lěto znowa wubědźowanje najlěpšich serbšćinarjow. Na olympiadźe serbskeje rěče so rěčne a pisomne kmanosće šulerjow 6. lětnika w serbšćinje pruwuja. Najlěpši serbšćinarjo z dohromady dźesać serbskich šulow Hornjeje a Delnjeje Łužicy wubědźuja so lětsa wot 26. do 28. měrca we wočerstwjenskim centrumje za dźěći a młodźinu Querxenland we Wodowych Hendrichecach. Z Delnjeje Łužicy wobdźěla so šulerjo Choćebuskeho Delnjoserbskeho gymnazija a zakładneju šulow Janšojce a Brjazyna. Z Hornjeje Łužicy su hólcy a holcy Budyskeho Serbskeho gymnazija kaž tež Serbskich wyšich šulow Budyšin, Worklecy, Ralbicy, Radwor, Kulow a Slepo přeprošeni. „Jako zamołwita koordinatorka olympiady serbskeje rěče skutkuje wo­spjet wučerka Radworskeje wyšeje šule ,Dr. Marja Grólmusec‘ Sabina Jurencec.“, rjekny hłowna koordinatorka SŠT Marlis Młynkowa. Šulerjo kwalifikuja so we wučbje serbšćiny za wubědźowanje. Za to pisaja wo temje, kotruž wučer wuzwoli, nastawk. Kotři šulerjo so na olympiadźe wobdźěla, rozsudźa fachowi wučerjo.