Sakski kultusowy minister Conrad Clemens poby zašłu srjedu we Łužicy. Tři kubłanišća je wón wopytował. Při tym słyšeše mnohe problemy, kotrež je tak abo podobnje tež hižo druhdźe zeznał.

A tak wón dojědźe: kultusowy minister Sakskeje Conrad Clemens (wězo CDU). Clemens je wulki, hlada přećelnje do wobličow tych, kiž jeho witaja. Woči pak přeradźitej, zo bě zašła nóc krótka, zo čaka w ministerstwje dosć dźěła na njeho. Zo je wón dźensa docyła we Łužicy, wo to je so Domowina postarała, rjekny kubłanska referentka Katrin Suchec-Dźisławkowa. Wona budźe přez cyłe dopoł­dnjo tež ta, kotraž so wo to stara, zo delegacija swój husty časowy plan dodźerži. W běchu štyrjoch a poł hodźiny tři kubłanišća na třoch wšelakorych městnosćach wopytować, to je samo za ministra ambicioněrowany plan. Wón wšak bě sej předewzał, w sto dnjach sto šulow wopytować. Popjelnu srjedu je wón pola „někak šěsćdźesat“, wón wuwjedźe.