Budyšin (SN). „Moja hłowa“ a „Wuši smój“ rěkatej spěwaj, kotrejž je 19 hólcow a holcow 4. lětnika zakładneje šule Ćišinskeho z Pančic-Kukowa loni krótko do hód w Budyskim studiju MDR serbskeho rozhłosa nahrawało. Dołho je trało, doniž njeje hudźbny producent Měrćin­ Weclich w nadawku MDR z hudźbnym redaktorom Handrijom Špitankom a aranžerom kaž tež nahrawanskim nawodu Friedrichom Steinke z Berlina projekt zakónčił. Wotnětka stej spěwaj mjez druhim na internetnej stronje serbskeho radija přistupnej a hodźitej so tam nimo mnohich druhich štučkow darmotnje na šmóratko přenjesć.

Hudźbny projekt šule Ćišinskeho z rozhłosowym sćelakom MDR je bjez dwěla něšto wosebiteho. Cyła rjadownja jednoho lětnika kubłanišća je so z busom do Budyšina podała, zo by tam w rozhłosowym studiju spěwaj nahrawa. Projekt zmištrowachu w běhu jenož jednoho tydźenja. To bě mjenujcy tydźeń do patoržicy.