Łaz (SN/AK). Burgfried Tannenhauer a Falk Nowotnick móžetaj skónčnje wodychnyć. Wot lěta 2011 dyrbještaj korčmar Łazowskeje Lěsneje hospody a mějićel campingoweho parka akceptować, zo bě Slěborny jězor dospołnje zawrjeny. Po lońšim prěnim wotewrjenju južneho pobrjoha staj wonaj lětsa zaso trochu wjace wobrota nadźěłałoj. „Z hospodarskeho wida bě to dobra sezona. Njejsmoj nadźiju ženje zhubiłoj, ale so na swoje zamóžnosće spušćałoj“, měni Burgfried Tannenhauer, kiž hižo 24 lět Lěsnu hospodu wobhospodarja. Hosćo tam su samo z Drježdźan, Čěskeje a Pólskeje.
Tež za čas zawrjenja přibrjoha je korčmar dale inwestował. Na žurli steja nowe blida a stólcy. Tež tři hóstne stwy su wobnowjene a z nowym přestrjencom, nowym myjadłom a nowymi meblemi wuhotowane. „Hospoda je derje wopytana. Z twarnišćow we wokolinje dźěłaćerjo tu přenocuja“, Burgfried Tannenhauer powěda. W swojich finskich hětach je wón špundowanje wobnowił. Přećelne barby w hětach wopytowarjow zwjeseleja. „Tež w ćežkich časach njejsmy nadźiju spušćili“, lěsny korčmar dodawa.