Štož dyrbjachu hižo w mnohich dalšich komunach wobzamknyć, steješe wčera tež na dnjowym porjedźe Trjebinskeje gmejnskeje rady, kotrejež čłonojo so w Miłorazu­ schadźowachu.

Miłoraz (AK/SN). Spočatk přichodneho lěta zwyši Trjebinska gmejna staršiski popłatk za žłobik, pěstowarnju a hort dźěćaceho dnjoweho přebywanišća „Lutki“, kotrež je w nošerstwje gmejny. Wona reaguje tak na přiběrace zawodowe kóšty a personalne wudawki minjenych lět. Snadna wjetšina šěsć radźićelow hłosowaše wčera za zwyšenje, pjećo běchu přećiwo tomu, jedyn so hłosa wzda.