Mjeztym hižo 40. raz móžeše předsyda Nowowješćanskeho towarstwa Wjesna zhromadnosć Křesćan Korjeńk w tamnišim towarstwowym domje škotowarjow ze wsy a wokoliny na zhromadne kartyplacanje witać.
Nowa Wjeska (aha/SN). Štóž so w škotowej rěči njewuznawa, je so zawčerawšim w Nowej Wjesce njemało dźiwał, słyšo, zo bu tam znaty muler nadobo krawc. Dale bě rěč wo čerwjenej rancy a zo dyrbješe so zeleny kral kłóć. Za jednym blidom hrajerjej zblědnyštaj, hdyž třeći wjesele zwěsći, zo staj čornaj. Tak a podobnje so rěčeše, jako w Nowowješćanskim towarstwowym domje za štyrjomi blidami w dwěmaj přechodomaj 320 króć karty měšachu.
