Budyski wokrjesny sejmik je na wčera­wšim posedźenju štyrjoch wěcywustojnych serbskich wobydlerjow jednohłós­nje do swojich wuběrkow wu­zwolił. Tam woni nětko z poradźowacym hłosom sobu dźěłaja. Namjety bě dźěłowy kruh za serbske naležnosće zapodał.

Budyšin (SN/at). Namjet Budyskeho krajneho rady Michaela Hariga (CDU) na januarskim wuradźowanju dźěłoweho kruha za serbske naležnosće je wokrjesny sejmik wčera zwoprawdźił. Tak su wokrjesni radźićeljo čłonce dźěłoweho kruha Katharinu Jurkowu do wokrjesneho a Christinu Šołćinu do socialneho a generaciskeho wuběrka kaž tež Serafinu Pašcynu do techniskeho wuběrka a do kulturneho a kubłanskeho wuběrka Renéja Wjacławka wuzwolili. Nawoda Serbskeho gymnazija widźi ćežišćo, „do wobzamknjenjow tež z našeje perspektiwy poradźować a serbske zajimy ofensiwnje zastupować“.