Pančicy-Kukow (BW/SN). Lipjo při klóštrje Marijinej hwězdźe w Pančicach-Kukowje měł so přichodnje zaso z woprawdźitym parkom stać a lěpje hač tuchwilu rjane městna k wotpočnjenju z wuhladom na klóštersku cyrkej skićić. Tole rjekny krajinowy architekt Clemens Bejmak sobotu něhdźe 25 wobdźělnikam pućowanja, na kotrež bě dźěłowa skupina Sakske zahrodowe stawizny přeprosyła. Wot Miłočana a wot Nory Kindermann z Drježdźanskeje techniskeje uniwersity woni zhonichu, kotre wosebitosće Lipjo něhdy skićeše, kajki wobstatk štomow tam mějachu a dźensa maja a kotre plany za přichod wobsteja.