Wulke twarske mašiny drje su so z wonkowneho napohlada Wotrowa zhubili. Mysla-li pak wobydlerjo na čas, jako běchu tam wjesnu kanalizaciju twarili, so někotrym hišće dźensa kornar puknje.
Wotrow (AK/SN). Swoju njespokojnosć je wjesnjanosta Pančic-Kukowa Markus Kreuz (CDU) na njedawnym posedźenju zaměroweho zwjazka za wopłóčki Při Klóšterskej wodźe zwuraznił. „Dźěła za wjesnu kanalizaciju we Wotrowje běchu přewšo špatnje planowane a zwoprawdźene. Twarska firma dyrbješe hišće raz přijěć, dokelž bě zabyła šachtaj přizamknyć“, Kreuz porokowaše. Nimo toho prašeše so wón za probu, hač su składźene roły krute dosć, zo z nich ničo njekapa.