Najebać chłódne wjedro serbscy wěriwi do Róžanta putnikowali

Róžant (SN/MWj). Špatne wjedrowe prognozy a hrožace mróčele na njebju njemóžachu wčera tomu zadźěwać, zo wěriwi ze serbskich katolskich wosadow w procesionach do Róžanta putnikowachu. Po starym wašnju njesechu družki postawy maćerje Božeje a je w Róžeńće před wołtarnišćom w dołhim rynku přihotowanych blidow wotstajichu. Po hrubym trochowanju zhromadźi so něhdźe 3 000 kemšerjow na putniskej łuce.

Božu mšu, kotraž so z tróšku zapozdźenjom zahaji, je Njebjelčanska wosada wuhotowała. Hłowny celebrant bě tuž farar Michał Nawka, kiž někotre kapki dešća za čas kemšow jako „nachwatanu krjepjeńcu“ komentowaše. Hudźbnje ­wobrubił je kemše Njebjelčanski cyrkwinski chór pod nawodom Gabriela ­Vaceka. K tomu hraješe Chrystof ­Mikławšk na elektro-pišćelach, a za čas přinosa darow zapleće wón tež serbski ludowy spěw.