Tradicionelnje přihotuja so Pěskečenjo na swój wulki swjatkowny koparski wjeršk z njedźelnišej zabawu w kruhu wjesnjanow. Ta bě tónraz zhromadnemu spěwanju wěnowana.
Pěskecy (JK/SN). Hižo na zažnym wječoru pjelnješe so stan před sportowym domom z wjesnjanami a hosćimi. Wo dobru naladu postara so DJ zwjetša z načasnej serbskej hudźbu kaž tež ze zabawu z ekstra mócnymi Pěskečanskimi mužemi. Tym poruči literski karan piwa z wupřestrětej ruku dźeržeć, doniž mocy njepopušća. Mužojo so tež dołho dosć prócowachu karan dźeržeć, přezjednje pak wubědźowanje runočasnje zakónčichu, tak zo njebě dobyćerja. Jako dźak smědźeše kóždy swój karan wupić.