Konjecy. (SN/BŠe). Konječanski młyn so tele dny chětro přeměnja. Přijědźeše-li ze Šunowskeho směra do Konjec, běše młyn ze štyrjomi poschodami stajnje krajinowa značka. Zdobom je młyn častodosć motiw pohladnicow delanskeje wjeski. Nětko pak rozsudźi dźowka by­wšeho mějićela Jurja Čornaka Claudia, chěžu přetwarić a młyn jako domske wužiwać. Tohodla potorhaja dźěłaćerjo młyn nětko wot štyrjoch na dwaj poschodaj. Štož wšak mnozy ludźo njewědźa, je, zo su chěžu tak a tak hakle lěta 1948 powyšili. Claudia Čornakowa a mandźelski Stefan chcetaj, zo dóstanje twarjenje zaso swój stary napohlad. Zmužity a nic cyle jednorje přesadźomny projekt, na kotryž staj so zwažiłoj, wšako prawdźepodobnje pódla domu Młynska hrjebja Klóšterskeje wody nimo wjedźe. Tuchwilu su wodu hrjebje přez spušćadło wotwodźowali, zo bychu móhli twarske dźěła zahajić. Nimo toho je wotpohladane, wotpowědnu rampu do Młynskeje hrjebje zatwarić, tak zo móhli so ryby bjez zadźěwkow po rěce pohibować.