Budyšin/Droby. Nadpad na młodźinski klub w Drobach w Radworskej gmejnje Nowe lěto 2012 wostanje w dalokej měrje bjez pokuty. 26lětneho Wjazońčana drje je Budyske krajne sudnistwo zawčerawšim w zwisku z wonymi podawkami k pjenježnej pokuće zasudźiło. Wobskóržba pak wobmjezowaše so na to, zo bě sej wón w rumnosćach młodźinskeho kluba pozdatnje nikomu njesłušacy mobilny telefon přiswojił.
Wróćozhladowanje: Party do Noweho lěta 2012 wotmě so za mnohich wopytowarjow Drobjanskeho młodźinskeho kluba hinak, hač běchu wočakowali. Něhdźe w 1.30 hodź. so skupina něhdźe 20 wosobow – tehdy zwjetša młodostni – namócnje do kluba zadoby. Štyrjoch wopytowarjow tam zranichu a wulki dźěl meblow a wuhotowanja zničichu. Přičina nadpada bě, zo běchu domjacy do toho někotrym z wobdźělenych přistup do kluba zapowědźili.
