Hubert Wróbl z Carlom championat žrěbjatow w Moritzburgu dobył
Moritzburg/Wotrow (BeW/SN). Wyskacy to aplaws z tribunow jěchanišća sakskeje krajneje kobłarnje w Moritzburgu za žrěbjo ze serbskeho konjenca. Prěni raz móžeše Hubert Wróbl lětsa w swojim Wotrowskim konjencu žrěbjo na swět witać. Jenož něšto měsacow pozdźišo steješe wón minjenu njedźelu ze swojim Carlom před sudniskej komisiju młodych žrěbcow (Hengstfohlen) Sakskeje. A je dobył.
Hižo před dwěmaj njedźelomaj bě so Wróblec žrěbjo na regionalnej přehladce w Jěžowje wulkotnje prezentowało. Z tehdy docpětym druhim městnom so wone za championat w Moritzburgu skwalifikowa. Zo pak so tam mjez 35 najlěpšimi přesadźi, z tym Hubert Wróbl ze žanej mysličku ličił njebě. „To je naše prěnje žrěbjo. Nimamy z nim hišće žane nazhonjenja, a nětko je tak wulkotnje wotrěznyło. To njemóžeš scyła tak prawje wěrić“, powěda Hubert Wróbl.
