Chrósćicy (SN). Hižo dźesać lět so Přezpólni na swjedźenjach po wšej Łužicy kaž tež na mjezynarodnych jewišćach derje čuja. W tym času su wjacore dźesatki spěwow zabyću wutorhnychu – zrudne a chutne runje tak kaž žortne a zdźěla samo nješwarne. Nětko hotuja so na jubilejny swjedźeń, kotryž wotměje so jutře za tydźeń, 20. awgusta, na Chróšćanskim Koklic statoku. Započatk budźe w 20 hodź. Po zhromadnym programje z cymbalowej skupinu Vojara z južneje Morawy a z rejwarjemi Wudworskeho folklorneho ansambla přizamknje so zabawa. Morawscy a serbscy ludowi hercy budu hač do nocy hudźić a spěwać.

Musku spěwnu skupinu Přezpólni załožichu 2006 jako dźěl Wudworskeho folklorneho­ ansambla. Hłowny zaměr cyłka je, pěstować serbski ludowy spěw w jeho prěnjotnej formje. Spěwa so jednohłósnje, přewod přewozmu dwoje husle a kontrabas. Swój repertoire čerpa skupina ze starych zapisow, mjez druhim ze Smolerjoweje/Hauptoweje zběrki pěsničkow z lěta 1841 a 1843.