Dźěłarnička žiwjensku kwalitu w Budyšinje přepytowała

Budyšin (CS/SN). K tak mjenowanej dźěłarničce k namakanju rozrisanjow je minjeny pjatk 24 Budyšanow do Kamjentneho domu přišło. Zaměr bě zdźěłać namjety, z kotrymiž hodźała so žiwjenska kwalita w sprjewinym měsće polěpšić.

Zo bychu so ćežišćam lěpje zbližić móhli, wutworichu wobdźělnicy tři dźěłowe skupiny. Prěnja zaběraše so z wobchadom, turizmom, dźěłom a bydlenjemi; druha přepytowaše zelenišća a žiwjensku kwalitu w měsće; třeća dźěći, młodźinu, sport a wólnočasne poskitki. Skupiny podachu so do intensiwneje klawsury, zo bychu rozjimali, što je w Budyšinje woprawdźe wažne.