Spěchowanske srědki rozsudźeja, hač změja klětu dalše twarnišća

Róžant (JK/SN). Dźakowano spěchowanskim srědkam po zakonju wo zesylnjenju inwesticiskeje mocy su tež w gmejnje Ralbicy-Róžant někotre dawno hižo potrěbne wotrězki gmejnskich dróhow ponowić móhli. Tak su so w Sernjanach wobydlerjo dróhi Při Hórce skónčnje asfaltoweho­ pokrywa dočakali. Zakład a spódk za to běchu před lětami hižo sami spřihotowali. Trěbne přepytowanje spódka wunjese, zo je dosć dobry a zo hodźi so powjerch asfaltować. Nadawk bě gmejnska rada na swojim posedźenju w awgusće přepodała firmje z Carneho Gozda (Schwarzheide). Minjeny tydźeń su dróhu při nowych jednoswójbnych domach asfaltowali. Nětko móža wobydlerjo swoje ležownosće ćim přijomnišo docpěć.