Z prašenjom wotwodźowanja wopłóčkow so w Njebjelčanskej gmejnje po wšěm zdaću hižo zaběrać trjebać njebudu. W Njebjelčicach su nětko poslednje domjacnosće centralnej wopłóčkowej syći přizamknjene.

Njebjelčicy (HS/SN). Jako posledni puć Njebjelčic je Lipowa wot srjedy oficialnje wodočisćerni w Němskich Pazlicach přizamknjena. Dźewjeć ležownosćow přewostaja swoje wopłóčki nětko zaměrowemu zwjazkej Horni Čorny Halštrow (AZV OSE). 12. septembra bě Wósporska hłubokotwarska firma dźěłać započała a je jenož tydźeń pozdźišo hač planowane wšitko dočiniła. Za naležnosće wobydlerjow Lipoweje mějachu twarscy dźěłaćerjo wjele zrozumjenja a pomhachu jim tež z fachowej radu, wšako dyrbjachu swoje domy w swójskej režiji domjacemu šachtej přizamknyć.

Na Lipowej su dohromady 190 metrow rołow z přeměrom 20 centimetrow składli a dalše 65 metrow domy přizamkowacych rołow. Zaměrowy zwjazk za wopłóčki je něhdźe 116 000 eurow inwestował. Tež Zwjazk a Swobodny stat Sakska so na financowanju wobdźělištej.