Kozarcy (BŠ/SN). K swojemu poslednjemu lětušemu turněrej zetkachu so serbscy škotowarjo-seniorojo minjenu wutoru w Kozarcach. Chorosće a druhich terminow dla dyrbjachu někotři krótkodobnje wotprajić, tak zo zhromadźi so něšto wjace hač 20 kartyplacarjow. Nawoda turněra Jan Macka poda kaž kóždy króć najprjedy přehlad wo dotalnych hrach a wo dalšich nowostkach. Lětsa běchu škotowarjo jara aktiwni, dohromady zliči Jan Macka 40 hrajerjow, štož je jara wjele. To je wšak hižo tradicija, wšako hraja škotowarjo hižo w 22. sezonje. Klětu započnje so přichodna, a to w februaru z cyle wosebitym jubilejom. Jan Macka je swoje podłožki přehladał a zwěsći, zo budźe to potom 250. turněr, kiž sobu na nohi staji. Kónc 1990tych lět, jako započa tajke zetkanja organizować, njeby ženje na to myslił, zo so turněry takle wobstajnje wotměja. Za muži a žony při blidźe pak je to wjace hač wojowanje wo dypki. Bjesada, zetkanje a žortowanje, to wšo słuša k tomu, tak wjacori měnja. A za to přijědu z Lubija, Chróstawy abo tež ze wsow za Kamjencom, druhdy samo tute dołhe čary z kolesom.