Mjenje dołha wopłóčkow dla

srjeda, 04. januara 2017
artikl hódnoćić
(0 )

Kulow (AK/SN). Wopłóčkowy zawod města Kulowa je w lěće 2015 derje hospodarił. „Z našeho wotličenja wuchadźa dobytk 70 000 eurow. Lěto do toho mějachmy hišće deficit 24 000 eurow“, rozłoži Jurij Brösan, nawoda wopłóčkoweho zawoda, na zašłym posedźenju Kulowskeje měšćanskeje rady. Po jeho słowach mě­jachu 1,194 milionow eurow dochodow a 1,124 milionow eurow wudawkow.

„Njemějachmy žane wjetše inwesticije. Dyrbjachmy jeničce někotre klumpy wuměnić“, rjekny Brösan. W lětomaj 2018 a 2019 budźe tomu hinak. Potom dyrbja wjetši dźěl klumpow ponowić. Wina na tym pak su zdźěla tež wobydlerjo, kotřiž často wěcy do nuznika mjetaja, kotrež w nim ničo pytać nimaja. Za to wopłóčkowe připrawy prosće twarjene njejsu. Tohodla apelowaše Brösan na posedźenju radźićelow na sobuzamołwitosć woby­dlerjow we wšitkich přizamknjenych domjacnosćach.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND