Budyšin (CS/SN). Mjeztym hižo šesty raz wotmě so we wosadnym domje w Budyskej Strowotnej studni symjenjowa bursa. Po słowach organizatora dr. Matthiasa Bergera žněje tele zarjadowanje lěto a wjetši wothłós. Su to přewažnje hobbyjowi zahrodkarjo, kotřiž chcedźa so z wotwisnosće wot wulkich producentow symjenja wuswobodźić. Dokelž tele firmy jeno symjo hybridnych rostlin poskićeja, njemóžeš ze žnjatych płodow sam žane symjo zdobyć. Zahrodkarjo tuž symjo z njehybridnych rostlin dobywaja a je mjez sobu měnjeja. Štóž njemóžeše ničo poskićeć, darowaše po swojich móžnosćach za wjacegeneraciski dom w Strowotnej studni.

Wjace hač sto zajimcow je wčera bursu wopytało, a to nic jeno z Budyšina, ale tež z wokrjesow Zhorjelc a Sakska Šwica a samo z Drježdźan. Bursy přizamkny hornjołužiska skupina towarstwa k zachowanju mnohotnosće wužitnych rostlin swoju lětnu hłownu zhromadźiznu, na kotrejž móžeše tež nowych čłonow witać. Aktiwity towarstwa koordinuje Birgit Fleischer z Cympela.