Nakup a wobhospodarjenje Budyskeje měšćanskeje hale „Króna“ njemóže město Budyšin financować. Zajim na filejowym kruchu pak dale je.
Budyšin (CK/SN). „Žadana płaćizna njeje jenož přewysoka, ale tež z prawniskeho wida njerealistiska.“ Z tymle wuprajenjom skónči Budyski financny měšćanosta dr. Robert Böhmer (njestronjan) na wčerawšim posedźenju měšćanskeje rady wšitke spekulacije, zo sprjewine město „Krónu“ kupi. Za 3,4 miliony eurow chce Berlinska předewzaćelska skupina Onnasch twar z wulkoparkowanišćom mjez Kamjentnej a Hornčerskej předać. Filejowy kruch to, kotryž po słowach někotrych radźićelow město njeměło wotpokazać. Wjacore frakcije běchu měšćanskemu zarjadnistwu nadawk dali nakup pruwować.
Wčerawša wotmołwa bě strózba. Po zasadach zlutniweho hospodarjenja, k čemuž je město winowate, „njepřińdźe nakup do prašenja“. Planowanych inwesticijow za twarske naprawy hač do lěta 2020 njejsu žane pjenjezy za nakup. Chcyli-li ju jako měšćansku halu dale wobhospodarjeć, dyrbjeli tójšto inwestować, rozkory bychu wotwidźomne byli.
