Krajnoradny zarjad powjetšenju Ralbičanskeje kormjernje swini přizwolił
Ralbicy (SN/MWj). Nadźija jako poslednja „zemrěje“. Ale „zemrěła“ wona nětko je, a to mjez wobydlerjemi Ralbic, kotřiž běchu so podarmo nadźijeli, zo snano tola k rozšěrjenju tamnišeje kormjernje swini njedóńdźe. Wotpowědnej próstwje Döbelnskeho ratarskeho předewzaća, kotremuž kormjernja přisłuša, je Budyski krajnoradny zarjad 21. februara přizwolił. Tole zdźěli přirjadnica krajneho rady Birgit Weber wčera wobydlerjam na zhromadźiznje na Ralbičanskej starej šuli. Tež wjesna skupina CDU, kotraž bě ludźi přeprosyła, hižo wědźeše, zo njemóže powjetšenju zadźěwać, su-li wšitke wuměnjenja spjelnjene, rjekny Eduard Luhmann, kiž wjace hač 50 zajimcow witaše.
