Slepjanski Serbski kulturny centrum (SKC) je wažne turistiske městno srjedźneje Łužicy. Wosebje wiki jutrownych jejkow lěto wob lěto wjace wopytowarjow přiwabjeja.

Slepo (AK/SN). K najwšelakorišim zarjadowanjam a přiležnosćam je loni 15 000 zajimcow Slepjanski Serbski kulturny centrum wopytało. Tole zdźěli jeho nawodnica Silwija Panošina na wčerawšim posedźenju Slepjanskeje gmejnskeje rady. Nimale 6 000 ludźi bě na zarjado­wanjach, 1 100 hosći je sej wustajeńcy wobhladało, 1 700 wopytowarjow wopřijachu pućowanske skupiny. 2 700 zajimcow je so po wobchodźe suweněrow rozhladowało. Na kursach debjenja jutrownych jejkow zličichu 700 wobdźělnikow. „A wjace hač 3 000 ludźi su dalši zarjadowarjo přiwabili, na přikład Vattenfall ze swojimi wukubłanskimi wikami“, rozłoži Silwija Panošina Slepjanskim ra­dźićelam.