Ramnow (SN). Lětuša Ramnowska hrodowa kołojězba konjacych zapřahow wotměje so njedźelu, 21. meje. Za jubilejnu 20. kołojězbu planuja organizatorojo jěchanskeho towarstwa Hufnagel wosebitu čaru. Start a cil budźetej před kulisu Ramnowskeho barokneho hrodu. Čara powjedźe wottam přez Biskopicy składnostnje 790lětneho wobstaća města. Připołdniša přestawka budźe při Steinaskim lěsnym hosćencu „Zur Finke“.
Kołojězba skići tež lětsa wobdźělnikam wulkotny wuhlad na łužisku krajinu. Podłu čary budu zajimawe stacije z překwapjenkami spřihotowane. Kołojězba započnje so w 9 hodź., do cila dojědu zapřahi něhdźe w 14 hodź. Při Ramnowskim baroknym hrodźe čakaja na wopytowarjow bohaty program a kulinariske poskitki.
Kołojězba nima w prěnim rjedźe charakter wubědźowanja, skerje steji wjeselo w srjedźišću. Nimo toho chcedźa organizatorojo na něhdyše rjemjesło pohonča a z nim zwjazanu bursku tradiciju jako kulturne namrěwstwo skedźbnić.
