Dom tysac hatow w Stróži, gmejna Malešecy, wobsteji dźensa pjeć lět. Zarjadnišćo je so tež na wažnu městnosć w skutkowanju Budyskeje župy „Jan ­Arnošt Smoler“ wuwiło.

Stróža (SN/at). Ze zhromadnymi zarjadowanjemi w informowanišću Dom tysac hatow chcetej zarjadnistwo biosferoweho rezerwata Hornjołužiska hola a haty a Budyska župa „Jan Arnošt Smoler“ wobydlerjam sewjerowuchodneje kónčiny Budyskeho wokrjesa serbske temy zbližeć. Tónle wot wobeju partnerow sformulowany narok, zakótwjeny w lěta 2010 podpisanym kooperaciskim zrěčenju, je so zaměrnje zwoprawdźił, zhladuje županka Jana Pětrowa na minjeny čas.