Gerda Pachow w Drěwcach ma trójce wob tydźeń swój wobchod wotewrjeny
Ze Spytečanskeho Rätzec młyna dóstawa wona wowsnu muku. Trěbne zorno za to dodawaja młynej wokolni ratarjo. Z něhdźe 50 procentow wowsneje muki a 50 procentow pšeńčneje muki, ze sele a droždźow pječe Gerda Pachow w Drěwcach we Łazowskej gmejnje wowsne całty. „Wupruwuju rady něšto nowe“, měni mějićelka Drěwčanskeho dworoweho wobchoda. Stajnje wutoru, pjatk a sobotu jón wona hižo rano zahe wotamka. Do toho něhdźe w třoch, sobotu hižo w dwěmaj, so jeje dźeń z přihotami ćěsta započina.
Dobry chlěb trjeba chwile
„Droždźe za całty trjebaja chwile. Dyrbja so najprjedy hibać“, praji Gerda Pachow. „Droždźowe ćěsto dyrbi wolumen měć. Hakle potom móžu za sobu całty wotpjec.“ Gerda Pachow pječe bjez přidatnych a barbnych maćiznow, dodawkow a bjez zesylnjakow słoda kaž glutamata. Wona ma so po přirodźe a jeje kaznjach, wužiwa recepty swojich prjedownikow. „Naše ćěło je přirodnu jědź zwučene. Wone je ze strowej jědźu žiwe a ju trjeba“, 65lětna wuzběhuje. „Najlěpši je stajnje hišće normalny rožkowy měšany chlěb.“
