Radwor (SN/BŠe). 119 křižerjow nastaji so jutrowničku připołdnju z Radworja do směra na Baćoń. Před Čornym Hodlerjom pak dóńdźe k wjacorym njezbožam, při čimž so někotři křižerjo zranichu. Jednoho z nich dowjezechu do chorownje. Na zbožo pak njeje so ćešo zranił. Wječor dožiwi Drježdźansko-Mišnjanski biskop Heinrich Timmerevers Radworskich křižerjow, mjez nimi noweho chorhojnika Dominika Jurka, třoch nowačkow a dweju slěborneju jubilarow na kěrchowje, hdźež so wotpuskny paćer modlachu. Po słowach biskopa běše to cyle emocionalny wokomik.
Ralbicy (aha/SN). 286 křižerjow, jeničce šěsć mjenje hač minjene lěto, wužohnowa farar Šćěpan Delan do Kulowa. Třeći raz nawjedowaše Daniel Wjesela procesion, w kotrymž bě lětsa pjeć nowačkow, sydom slěbornych jubilarow a 40. raz jěchaštaj Gerat Krawc ze Smjerdźaceje a Michał Šołta z Pěskec sobu. Nowosć­ bě – něchtó njemóžeše so na to dopomnić –, zo je so do křižerskeho procesiona zarjadował por z Jitka, a to Enrico Pilc ze swojim synom Jonathanom.