Šwarna ličba hudźbnych cyłkow beneficny nyšpor wuhotowała
Chrósćicy (CRM/SN). „Najdrohotniši hudźbny nastroj w našej cyrkwi su pišćele. Wone su wšědnje trěbne“, praji Chróšćanski farar Měrćin Deleńk. Nětko je wjetša techniska reparatura trěbna. Wuměnjenje elektroniskeho wuhotowanja njeje hižo wobeńdźomne. Budyska pišćeletwarska firma poskići akceptabelny namjet. Financne móžnosće wosady pak wón přesahuje. Wčera, njedźelu, su tuž wosadne hudźbne a spěwne cyłki beneficny nyšpor wuhotowali.
We wołtarnišću přednjesechu dujerjo pod nawodom Jurja Hejduški a Jurja Jakubaša swjedźenske kruchi. Při tym złožowachu so předewšěm na pozběhowacy błyšć baroka, štož wosebje swjatočnje skutkowaše. Woni přewodźachu tohorunja kěrluše wosadnych. Dźěćaca šola z nawodnicu Gabrielu Brězanowej poda přihódny dźěl swojeho angažementa k Božej česći a spomóženju wěriwych. Kěrluš „Naš Knjez přesadźuje hory“ zaspěwa cyłk młodostnych Precatio. Dalšu zajimawu hudźbnu barbu poskićištaj Christin Popelic na pianje a jeje bratr Daniel ze spěwnym solom.
