43. raz wotměja so za tydźeń Němčanske wjesne swjedźenske hry. Do programa zarjadowanja kołowokoło 36,70 metrow wysokeje meje su zaso tradicionalne dypki, ale tež nowe ideje zapřijeli.­

Němcy (UH/SN). Wjesny klub, młodźinski klub a dobrowólna wohnjowa wobora wuhotuja wot 19. do 21. meje zhromadnje lětuše 43. wjesne swjedźenske hry w Němcach. „Wot přichodneje wutory hač do štwórtka chcemy swjedźenišćo přihotować a nadźijamy so, zo nam prawje wjele wobydlerjow při tym pomha“, praji zastupowacy předsyda wjesneho kluba Handrij Korch. Wón wuzběhnje, zo za tónle swjedźeń nimale wšitko sami na nohi staja, při čimž jich mnozy sponsorojo podpěruja.