Na njedawnym cyłoněmskim dnju architektury běchu na wjacorych městnach zajimawe twarjenja widźeć. Mjez nimi bě jedne, w kotrymž maja kriminalni policisća swoje rumnosće.

Wojerecy (AK/SN). Wažny dźěl měšćanskich stawiznow wuchowaja Wojerecy přichodnym generacijam. Tamniša kriminalna policija dźěła w twarjenju na Frentzelowej, kotrež steji pod pomnikoškitom. „Dom nasta wokoło lěta 1916 w reformowym stilu“, rozłoži architekt ­Stephan Schultze na cyłoněmskim dnju architektury. Tam je wón njedawno wopytowarjow po domje wodźił. Wot lěta 2013 hač do lońšeho bě Swobodny stat Sakska twarjenje za 4,4 miliony eurow ponowić dał.