W serbskej wokolinje wčera 40 młodych baćonow wopjeršćenili
Njeswačidło/Ralbicy (SN/BŠe). Čłonojo spěchowanskeho towarstwa Njeswačanskeje přirodoškitneje stacije su wčera cyłkownje 40 baćonow w štyrnaće hornjołužiskich hnězdach wopjeršćenili. To je wažne, zo móhli jich populaciju wobkedźbować. Tak pobychu mjez druhim w Sernjanach, Chasowje, Radworju, Dobrošicach a Komorowje. Rjanu překwapjenku dožiwichu w Ralbicach. Poprawom běchu tam z třoch młodźatow wuchadźeli. Jako pak so přirodoškitarjo ze zběhadłom hnězdu bližachu, wuhladachu woni štyri.
Bližiš-li so młodym baćonam, so wone lehnu a hižo njehibnu. To mjenunja fachowcy akinezu. Mjeztym zo je starši baćon, pochadźacy ze sewjera Němskeje, činjenje při hnězdźe wobkedźbował, dachu sej młodźata proceduru lubić. Fachowcy je wažachu a wuměrichu křidła. Wčerawše młode baćony běchu dwaj do tři kilogramy ćežke a mějachu 30 do 40 centimetrow dołhe křidła.
