Łazk (JK/SN). Hdyž dźe wo to, woswjećić na hódne wašnje wurjadnu róčnicu swojeje wsy, njedawa za mnohich wobydlerjow našich serbskich wsow někajkeje mjezy. Tež Łazkowčenju su sej přihot a přewjedźenje jubilejnych 600. narodnin wsy rozdźělili na mnohe ramjenja. Nimale wšitcy wjesnjenjo su pomhali přihotować swjedźeń za nětčišich kaž tež něhdyšich wobydlerjow.
Minjenu sobotu su swjedźeń z dźaknym nyšporom, na kotrymž so tež wosadny farar Šćěpan Delan wobdźěli, zahajili. Po tym dachu sej kofej a tykanc wjesnych hospozow słodźeć. Při swačinje zabawjachu nahladnu ličbu hosći wjesne dźěći ze spěwami a basnjemi, prjedy hač krónowachu swój program z naročnej kłobukowej přehladku, kotraž žněješe wulke připóznaće hosći.
