Hnadowny kwas dožiwiłoj

štwórtk, 31. awgusta 2017
artikl hódnoćić
(0 )
Alfred Worjech a jeho mandźelska Herta staj wčera w Brězynje swój 70. kwasny dźeń – hnadowny kwas – dožiwiłoj.  Foto: Carmen Schumann Alfred Worjech a jeho mandźelska Herta staj wčera w Brězynje swój 70. kwasny dźeń – hnadowny kwas – dožiwiłoj. Foto: Carmen Schumann

Worjechec mandźelskaj Alfred a Herta w Brězynje pola Hućiny swjećeštaj wčera swój 70. kwasny dźeń, potajkim hnadowny kwas. Wonaj lubujetaj, hdyž mataj wjele dźěći wokoło sebje. A tak je jimaj wčera tež skupina Hućinjanskeje pěstowarnje k čestnemu dnjej gratulowała. Mandźelskaj staj samaj pjeć dźěći kubłałoj a wjeselitaj so dźensa nad 14 wnučkami a 17 prawnučkami. Cyła wulka swójba woswjeći njewšědny jubilej sobotu w Brězynskim hosćencu ze 60 ludźimi.

29. awgusta 1947 staj so Herta a Alfred Worjechec stawnisce zwěrowałoj, nazajtra w Hućinjanskej cyrkwi. Mandźelska bě po Druhej swětowej wójnje ze Šleskeje do Brězyny přišła. Mandźelski wobhospodarješe burski statok, kotryž běštaj jeho dźěd a wowka před 105 lětami załožiłoj. Alfred Worjech pochadźa z ewangelskeje serbskeje swójby a wopytuje dźensa hišće serbske Bohosłužby, kotrež pak so w Malešanskej cyrkwi jeno zrědka wotměwaja. W 1950tych lětach bě wón předsyda Hućinjanskeje Domowinskeje skupiny, tež dźensa hišće wón třěšnemu zwjazkej přisłuša. Wjele lět je za Ludowe nakładnistwo Domowina w swojej wsy Serbsku protyku předawał.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND