Wotkryte twarske ležownosće tež w Budyskim wokrjesu požadane

Budyšin (SN/mwe). Płaćizny za twarske ležownosće w Budyskim wokrjesu su minjene pjeć lět ekstremnje stupali. Trend dale na to pokazuje, zo budu ludźo přichodnje hišće wjace na kwadratny meter płaćić dyrbjeć. „Su-li sej před lětami w Chrósćicach, Jaseńcy abo Sernjanach předawarjo pódy na kwadratny meter 20 eurow žadali, chcedźa dźensa 35 do 50 a hišće wjace eurow měć“, imobilijowy makler Jan Hórnik wobkruća. Kaž wón dodawa, zaleži to wosebje na tym, zo su płaćizny za wotkrywanje ležownosćow z kładźenjom medijow a za dalše naprawy w zašłosći mócnje stupali. Z teje přičiny su tež wotkrywanske firmy parcele wo tójšto podróšili.