Mjeztym 20. nazymske přirodowe wiki wotměja so sobotu, 9. septembra, wot 10 do 17 hodź. w Stróži pola Hućiny. Hižo­ wječor do toho dožiwja tam wopytowarjo koncert klasiskeje hudźby.

Stróža (SN). Hnydom wjacore nowosće čakaja na wopytowarjow 20. nazymskich wikow přirody w Stróži, na kotrež přeprosy sobotu, 9. septembra, zarjadnistwo biosferoweho rezerwata Hornjołužiska hola a haty a Stróžanske domizniske towarstwo Radiška. Tak dóstanje tamniši Dom tysac hatow nětko tež logo w serbskej rěči. Nimo toho poskića prěni raz nowe Hornjołužiske holanske piwo. Warili su je ze starych družin ječmjenja, kotrež hižo něšto lět w biosferowym rezerwaće plahuja.